As Residencias Paraíso medran na súa segunda xeira

Abre a convocatoria para oito proxectos de danza que poderán empregar ata nove espazos

Tres novos espazos e dous proxectos máis incrementan o alcance das Residencias Paraíso, o programa de apoio á creación que desenvolven o Colectivo RPM e mais a Axencia Galega das Industrias Culturais. O Teatro Colón da Coruña, a Sala X da Facultade de Belas Artes de Pontevedra e a Sala Agustín Magán de Compostela son novos espazos que se suman ao programa e que completan a oferta do pasado ano, composta polo Teatro Rosalía de Castro e a Fundación Luís Seoane na Cidade Herculina, o Auditorio Municipal de Ourense, o Pazo da Cultura de Carballo, o de Narón e mais o Vello Cárcere de Lugo. A convocatoria mantén no entanto o seu orzamento máximo en 18.000 euros.

O programa prevé apoiar ata oito proxectos de danza e artes do movemento que se desenvolverán entre marzo e novembro de 2018. Segundo explica na súa presentación, esta iniciativa "pretende fomentar a aparición de novos proxectos de creación, impulsar a formación de novas agrupacións de artes do movemento, así como alimentar as necesidades das compañías consolidadas do territorio galego durante os seus períodos de creación. Enténdese por residencia artística un espazo e un tempo adicado á investigación ou creación e, polo tanto, sen obrigatoriedade de elaboración dun produto escenico concluído". Os participantes amosarán os seus traballos nunha xornada aberta o vindeiro 29 de novembro de 2018 na Sala Agustín Magán do Centro Sociocultural de Santa Marta en Santiago de Compostela. O prazo de presentación a esta convocatoria está aberto ata o 12 de febreiro de 2018.