Asociacións de defensa do patrimonio de Lugo denuncian na Fiscalía a destrución dun castro en Mondoñedo

As asociacións Mariña Patrimonio e Adega compareceron antonte ante os medios para informar da denuncia na Fiscalía das actuacións da Xunta de Galicia en relación á destrución do castro de Trinidade-Flores, ubicado entre os concellos de Mondoñedo e Lourenzá (Lugo). Segundo estas entidades, a "empresa propietaria da canteira puido ter causado danos irreparables na meirande parte deste ben patrimonial malia ter recibido varias denuncias". Mariña Patrimonio e Adega sinalaron que "persoal técnico da Dirección Xeral de Patrimonio da Consellería de Cultura da Xunta elaborou un informe no que se pretendía demostrar a inexistencia do sitio arqueolóxico, coa finalidade de quitarlle a protección que lle corresponde". Segundo as entidades, "a non paralización das actividades mineiras que afectaban ao castro, xunto cos informes elaborados polos técnicos da Xunta para desprotexelo puideron ser determinantes para a destrución deste ben patrimonial". Segundo El País, a Fiscalía xa iniciou unha investigación a partir da denuncia.