O Museo da Catedral de Santiago intégrase en Google Arts & Culture

Google Arts & Culture, a plataforma do buscador que alberga versións dixitalizadas de contidos de diferentes museos e institucións de todo o mundo, conta xa coa presenza do Museo da Catedral de Santiago nas súas fileiras. Catro historias interactivas dedicadas ao propio museo, aos tapices de Goya que se custodian no mesmo, ao Camiño de Santiago e mais ao Mestre Mateo compoñen o debut da entidade neste espazo, cun total de 68 imaxes de diferentes pezas que inclúen desde estatuas ata páxinas do Códice Calixtino ou o martelo para abrir a Porta Santa.