Soleá. 8 anos. Fotografía de El mundo al principio. Infans.
O xurado do Premio Galicia de Fotografía Contemporánea, que convocan anualmente Festival Outono Fotográfico, a Xunta de Galicia e a Deputación de Lugo, deu a coñecer onte o fallo da súa sexta xeira.
A creadora malagueña Virginia Rota impúxose no certame co seu proxecto El mundo al principio. Infans., un achegamento "á sabedoría da infancia e sobre a liberdade do pensamento" no que retrata a 22 crianzas. Tal e como recollen as bases do galardón, estas imaxes tomarán agora a forma dunha exposición que terá unha itinerancia de dous anos e verán a luz na forma dun catálogo. Canda a ela, resultaron finalistas desta xeira do certame Miguel Auria e Rosi Pardagunde.
O xurado, formado por Carmen Dalmau, Isabel Lázaro, Anxela Caramés, Encarna Lago Gonzalez, Fernando del Río, Xosé Lois Vázquez e Vítor Nieves, en presencia de Ofelia Cardo como secretaria, acordou por unanimidade a declaración da gañadora na tarde de onte.
