Eva Díez imponse no III Premio Galicia de Fotografía Contemporánea

Un percorrido por casas abandonadas no que se exploran "as oposicións esencias da fotografía" foi o proxecto gañador da III Edición do Premio Galicia de Fotografía Contemporánea. Eva Díez impúxose neste galardón co proxecto Renacer, que lle reportará 12.000 euros en metálico ademais da montaxe dunha exposición e da edición dun libro con estas imaxes. O xurado do premio estaba composto polo curador e profesor de Belas Artes X.M. Buxán Bran; o fotógrafo e conservador da Colección Alcobendas José María Díaz Maroto; a directora do Festival Encontros de Agosto de Fortaleza, Brasil; o director do Outono Fotográfico, Xosé Lois Vázquez; o curador da sección oficial do festival, Vítor Nieves; Encarna Lago, xestora da Rede Museística da Deputación de Lugo e Mercedes Gallego representando á Xunta de Galicia, facendo como secretaria Manu Gallego, secretaria tamén da Asociación Proxecto Benito Losada. O premio está convocado no marco do festival Outono Fotográfico co patrocinio da Xunta de Galicia e da Deputación de Lugo.

A coincidir con este fallo, onte abría no Pazo da Cultura de Pontevedra a primeira das exposicións integradas no Outono Fotográfico deste ano. Santi Vega asina Pretty as a picture, unha análise sobre a relación entre fotografía e pintura, que se pode ver ata o vindeiro 15 de novembro.