Dezaseis librarías reúnense na segunda Festa dos Libros de Pontevedra

A Praza da Ferraría acolle entre os vindeiros 20 e 24 de xuño a segunda xeira da Festa dos Libros de Pontevedra. Quince librarías de Pontevedra e unha portuguesa participan neste encontro que presentou onte o seu programa. En total serán sesenta os autores que farán parte dos trinta e cinco actos previstos.

Presentacións, sinaturas, mesas redondas, concertos e actividades para crianzas sucederanse nunha serie de propostas que contarán con nomes como David Neira, Rafael L. Torre, Rafael Fontoira, Xosé Fortes, Genaro da Silva, Antonio Sá Gué, César Lorenzo Gil, Suso de Toro, Arantza Portabeles, Milagros Bará, Ledicia Costas, María Oruña, Manuel Lourenzo, Manel Loureiro, Rafa Cabeleira, Kiko da Silva ou Diego Ameixeiras entre outros.

Haberá tamén espazo para lembrar a María Victoria Moreno, cunha mesa redonda participada por Fina Casalderrey, Montse Fajardo, Anxela Gracián, Montse Pena, Xavier Senín e Eli Ríos e mais a proxección do documental Galega por amor. Un distintivo para visibilizar lecturas orientadas ao colectivo LGTBI ou un paseo pola Pontevedra Literaria guiado por Montse Fajardo son outras das propostas que se inclúen n programa.