"O apoio á cultura non é unha subvención senón un investimento". Este é un dos puntos das conclusións que o Galeusca de Editoras, que se celebrou na Coruña entre o 13 e o 15 de xuño, acaba de facer público. O encontro de empresas da edición reuniu representantes dos colectivos sectoriais de Galicia, Euskadi e Cataluña para abordar os retos deste ámbito. Entre as súas reivindicacións está un incremento nos investimentos públicos na industria editorial, o desenvolvemento de plans de lectura acordados co sector ou o incremento das propostas de internacionalización. Ademais, as entidades participantes comprometéronse en colaborar na "defensa das linguas nacionais" e apuntaron a necesidade de políticas conxuntas neste campo. O manifesto apela tamén a "corrixir as desigualdades de xénero que aínda existen" no ámbito editorial.
