Co lema "En galego día a día" a plataforma Queremos Galego chama a participar na manifestación que organiza este dezasete de maio en Compostela. O colectivo convoca a cidadanía para as 12 horas na alameda da capital galega nunha mobilización que lle reclama ao goberno que desenvolva medidas a prol da nosa lingua. Segundo indicou o voceiro da Plataforma, Marcos Maceira, "en Galiza é o propio goberno galego, co presidente Feixó á cabeza, quen actúa como un vulgar delegado do goberno español, renegando das funcións que lle dá o estatuto de autonomía e da alta representación de Galiza que debería exercer”. Como consecuencia, sinalou, “o galego é o único idioma oficial do Estado que diminúe en falantes e carece de apoio do seu propio goberno”.
A manifestación ten previsto rematar na Praza da Quintana, onde a comunicadora e actriz Nieves Rodríguez, conducirá un acto final no que actuarán Franki e os labregos da linguaxe co rap Rapea, que a lingua non para, manifesto gañador do Correlingua 2018.
