A sede do Consello da Cultura Galega en Santiago de Compostela acollía esta mañá a presentación da Biblioteca Castelao. A Asociación José Afonso Galiza e mais o Concello de Rianxo botan a andar esta iniciativa que abrirá as súas portas o vindeiro 19 de maio en Lisboa. A intención é crear na capital portuguesa unha biblioteca dedicada a temas galegos e que reflicta a actualidade da nosa creación literaria.
Co nome de Biblioteca Castelao, o proxecto nace cun núcleo de cincocentos volumes e estará localizado na sede da Asociación José Afonso. Con este proxecto quérese homenaxear ao tempo o grande interese de José Afonso pola realidade galega e mais o recoñecemento de Castelao das ligazóns do noso país con Portugal.
