Un incendio rematou coas vivendas do castro das Barreiras

Finalizou a campaña de excavación no castro das Barreiras (Vimianzo), un sitio arqueolóxico atípico, xa que está emprazado no medio da chaira do val. Segundo declarou a La Voz de Galicia o responsable da intervención, o arqueólogo Ángel Concheiro, as dúas vivendas exhumadas viñéronse abaixo tras un importante incendio do que fica en terra un importante nivel de queimado. Entre as novidades da intervención atópase a confirmación da existencia de obradoiros metalúrxicos no castro, xa que se atopou un molde de fundición, así como a súa cronoloxía de finais da II Idade do Ferro, entre o século III a.C. e o I a.C.