Fotografía da exposición de Catalá Roca
O vindeiro 9 de maio abre as súas portas no Auditorio de Galicia de Santiago de Compostela a exposición Turismo e fotografía. Català-Roca en Galicia. 1956-1976. A mostra, comisariada por Anxo Rabuñal, presenta 116 imaxes, entre elas algunhas inéditas, seleccionadas entre o milleiro de fotografías que Català-Roca tomou nas viaxes que realizou en Galicia durante 20 anos para guías turísticas. O conxunto amosa un retrato da transformación do noso país durante o franquismo a centrar o seu foco na vida cotián. A exposición, unha coprodución dos concellos de Santiago e da Coruña poderá verse na capital galega ata o vindeiro 7 de outubro para visitar con posterioridade o Kiosko Afonso da Cidade Herculina.
