Logo dun investimento de 700.000 euros o Castelo de Soutomaior abrirá o vindeiro 12 de maio as portas cunha nova musealización. A Deputación de Pontevedra presentaba onte cunha visita os contidos que atoparán os visitantes logo desa data e que inclúen proxecións audiovisuais, recreacións en 3D ou un videomapping sobre os propios muros da fortaleza. Un repaso pola vida de persoeiros vencellados ao castelo en diferentes épocas, como son Pedro Madruga, Antonio Aguilar e Correa ou MarÃa Vinyals, a relación do enclave coa paisaxe, a liñaxe dos Soutomaior, a guerra irmandiña ou a evolución dos edificios ao longo do tempo son algúns dos contidos que farán accesibles aos visitantes. Ademais, o conxunto contará cun novo web que ademais de achegar información e contexto ao monumento permitirá reservar visitas.
