O castelo de Pambre, o monumento emblemático do interior de Galicia que leva varios anos en proceso de restauración, abrirá finalmente as súas portas o 27 de setembro. A visita será gratuita ata final de ano para despois contar cunha entrada "simbólica", segundo sinalou o alcalde de Palas de Rei e sinala hoxe El Progreso. Os primeiros en visitalo, antes mesmo da apertura oficial, foron os alumnos do IES de Palas de Rei. O compromiso do concello é que os escolares do municipio e os veciños sexan os primeiros en visitar o castelo despois da súa rehabilitación. Por outra banda, hoxe comezaron as visitas teatralizadas ao Castelo de Soutomaior, elaboradas por Limiar Teatro e financiadas pola Deputación de Pontevedra. As visitas amosan aos visitantes varias épocas da vida do castelo e durarán ata o 23 de outubro. Todas as prazas están xa esgotadas.
