Rematada a súa xira por diferentes festivais, a longametraxe Nove de novembro, primeira de temática gai realizada na nosa lingua, chegará ás pantallas dos cinemas galegos o vindeiro 7 de abril. O Teatro Colón da Coruña acollerá a estrea nunha gala na que participará Lázaro Louzao, director do proxecto, canda ao equipo técnico e artístico desta produción. Ademar Silvoso e Brais Yanek protagonizan esta historia de amor ambientada no final dos anos 80.
O proxecto, que conseguiu boa parte do seu financiamento mediante crowdfunding, puido verse en eventos como o festival vasco Zinegoak, o New Renaissance de Amsterdam ou o qFLIX de Philadelphia.
