Fóra dos museos reflexiona sobre o papel destes centros en Galicia

"Que repertorios caracterizan o sistema museal galego? Por que outros carecen de presencia? Que acontece, por exemplo, coa arte do exilio e cos testemuños materiais da represión franquista? E historicamente, en que modo contribuíron os museos á formación do sistema cultural galego? Na súa actual configuración: a que horizontes responde?". Estas son algunhas das preguntas ás que quere responder o ciclo Fóra dos museos que comisaria Sabela López Pato na compostelá Sala NUMAX.

O proxecto, que bota a andar este martes 13, amosará de xeito sucesivo ao longo de oito meses seis pezas achegadas por coleccións públicas e privadas do país. Arredor de cada unha delas desenvolverase unha conversa con traballadores e traballadoras de museos para saber máis sobre cada un dos elementos e mais sobre as problemáticas do sistema museal do país.

Un fragmento do mosaico romano da Cigarrosa inicia a vindeira semana a actividade, cun encontro no que Xulio Rodríguez e Ana María Veiga, do Museo Arqueolóxico Provincial de Ourense, xunto á comisaria da actividade debaterán sobre "A orixe histórica dos museos galegos e o traballo das Comisións Provinciais de Monumentos" a partir das oito da tarde.