IlMaquinario Teatro lidera as candidaturas aos Premios María Casares

A Festa dos Nomeados/as daba a coñecer onte as candidaturas finalistas aos Premios María Casares 2018. En total, nove espectáculos compiten por se facer cos galardóns da Asociación de Actores e Actrices de Galicia nalgunha das catorce categorías convocadas. Resaca de IlMaquinario Teatro parte como favorita, xa que os votos dos profesionais do sector situárona como aspirantes en dez categorías. Canda a ela, Martes de Carnaval, do Centro Dramático Galego, aspira a 9 galardóns mentres A cabeza do dragón, de Producións Teatráis Excéntricas e Soño dunha noite de Verán de Voadora optan a cadanseus 7 recoñecementos e Elisa e Marcela, de A Panadaría, está presente en 6 categorías.

Pola súa banda, Cándido Pazó pode facerse co premio ao mellor texto orixinal por Fillos do sol de Contraproducións, mentres Outono de Pistacatro pode levar o de mellor maquillaxe e compite no premio ao mellor espectáculo infantil con A galiña azul, de Tanxarina, e Pum, Pum!, de Baobab Teatro. Os galardóns entregaranse o vindeiro 21 de marzo na gala que se celebrará no Teatro Rosalía de Castro da Coruña.

Listaxe de candidaturas aos Premios María Casares 2018

1. Resaca. IlMaquinario Teatro (10): espectáculo, dirección (Tito Asorey), actriz protagonista (Melania Cruz) actor protagonista (Fran Lareu), actriz secundaria (Laura Míguez), actor secundario (Fernando gonzález), texto orixinal, música orixinal, escenografía, e iluminación.

2. Martes de Carnaval. Centro Dramático Galego (9): Dirección (Marta Pazos), actriz protagonista (María Roja) actor protagonista (Miquel Insua), actriz secundaria (Anabell Gago), adaptación/tradución, iluminación, escenografía, maquillaxe e vestiario.

3. A Cabeza do dragón. Producións Teatráis Excéntricas (7): dirección (Quico Cadaval), actor protagonista (Iván Marcos), actor secundario (por partida dupla: Josito Porto e Víctor Mosqueira) adaptación/tradución, iluminación, e vestiario.

4. Soño dunha noite de verán. Voadora (7): espectáculo, actriz secundaria (Areta Bolado), adaptación/tradución, escenografía, música orixinal, maquillaxe e vestiario.

5. Elisa e Marcela. A Panadaría(6): espectáculo, dirección (Gena Baamonde), actriz protagonista (Areta Bolado), actriz secundaria (Ailén Kendelman), texto orixinal e música orixinal.

6. Outono. Pistacatro (2): espectáculo infantil e maquillaxe.

7. A galiña azul. Tanxarina (1): espectáculo infantil

8. Fillos do Sol. Contraproducións(1): Texto orixinal

9. Pum Pum!Baobab Teatro (1): espectáculo infantil