Voadora e Chévere encabezan as candidaturas aos XIX María Casares

A tempestade de Voadora e mais a compañía Chévere coas producións Ultranoite no país dos ananos e As fillas bravas encabezan a listaxe de candidaturas aos XIX Premios María Casares. Compite con elas Perplexo de Ilmaquinario Teatro, que acumula nove candidaturas. A sede do Consello da Cultura Galega acollía esta maña a presentación dos nomeados aos galardóns que organiza a Asociación de Actores e Actrices de Galicia. En total son 16 espectáculos os que optan a se facer co premio nalgunha das 14 categorías, dunha ampla participación que chegou a 43 montaxes e 370 profesionais. Por vez primeira, os galardóns inclúen unha categoraía de mellor espectáculo infantil, que se desputan Roedores, de Redrum, As fabas máxicas de Caramuxo e A casa do Avó de Tanxarina.

En total, A tempestade opta a dez premios, mentres a Ultranoite no país dos ananos repórtalle a Chévere sete opcións a premio, ás que se suman outras tres de As fillas bravas.

A distancia das tres obras con máis candidaturas, Kassa con 3 nomeacións, Pan! Pan!, Meu ben e Roedores e Pequenas certezas con dúas, e Demolición, Bobas e galegas, O Feo, Ra, ra, ra, As fabas máxicas e A casa do Avó con unha. Dos espectáculos do Centro Dramático Galego de 2014 unicamente Longa viaxe cara á noite opta a un premio, o de mellor actriz protagonista.

Na categoría de mellor espectáculo compiten A Tempestade, Perplexo e Ultranoite no país dos ananos, mentres que á mellor dirección optan chévere, Tito Asorey e Marta Pazos. Nos mellores actores protagonistas enfróntanse Machi Salgado por O Feo e mais Fran Lareu e Fernando González de Perplexo, obra que tamén lles valeu os nomeamentos a mellor actriz a Laura Míguez e Melania Cruz. As dúas compiten con Elina Luaces de Meu ben, Luisa Merelas de Longa viaxe cara a noite e Sheyla Fariña de Roedores.

En canto a textos orixinais, compiten Cándido Pazó por Demolición, Manuel Cortés por Ultranoite no País dos Ananos e Quico Cadaval por Bobas & Galegas.