Antoni Muntadas protagoniza a primeira mostra do ano no CGAC

O Centro Galego de Arte Contemporánea acolle desde o pasado venres 17 de febreiro a mostra Estratexias do desprazamento. Antoni Muntadas inaugura o ano expositivo do centro cunha retrospectiva que "a través de proxectos específicos incorpora o xiro recente da súa mirada cara á paisaxe". Para alén de obras anteriores, o espazo compostelán acolle tamén as series inéditas Guadiana (2017) e Finisterre (2017). Segundo explica a presentación da mostra, Muntadas "traza un percorrido que refire un territorio inestable, cargado de interrogantes, nunha selección de proxectos que converxen ao redor de tres ideas: perder(se), desaparecer, ir(se)", baixo o comisariado de Alicia Chillida. O proxecto poderá visitarse ata o vindeiro 17 de xuño.