Imaxe de Contigo y sin ti, de Loreto Martínez Troncoso.
Vestiges d'un ici, vestixios de si é o título da exposición que o Centro Galego de Arte Contemporánea lle dedica á obra recente de Loreto Martínez Troncoso. A partir das 20 horas de hoxe e ata o vindeiro 10 de xuño, o CGAC acolle esta exposición na que, con comisariado de Chus Martínez se propón unha "lectura/relectura e ao propio cuestionamento da obra que vén escribindo/presentando nos últimos anos, insistindo nos procesos e nas ideas, nos traballos conxuntos, abertos, xunto ás implicacións das súas intervencións no marco da complexa construción dun tempo presente". Segundo sinala a presentación do proxecto, a mostra "relaciónase especificamente cos espazos do CGAC, permitíndolle explorar diferentes posibilidades de transformación nas obras e no discurso expositivo".
Para alén das obras que se poderán ver, no marco desta actividade prográmase o vindeiro 27 de abril ás 20h a estrea da ópera Euphoria, escrita para a ocasión en colaboración co compositor Ramón Souto.
Antes diso, e en paralelo á exposición o CGAC conmemorará os vindeiros 15 e 16 de febreiro os 20 anos do proxecto Lost in sound. Deste xeito, prográmase a terceira xeira deste encontro dedicado á música electrónica emerxente na que se mesturarán debates e mesas redondas con sesións de picadiscos. Jus Kno´, Viktor Flores ou Lowlight son algúns dos creadores que farán parte da iniciativa.
