Diferentes iniciativas lembran a Rosalía de Castro ante a proximidade do seu día

Segundo se achega o 24 de febreiro, data proposta pola Asociación de Escritores en Lingua Galega para celebrar o Día de Rosalía, multiplícanse as actividades que lembran a poeta. Deste xeito, xa desde onte a Semana Convergências Portugal-Galiza que organiza o Centro de Estudos Galegos da Universidade do Minho ten a escritora como eixe das súas actividades. Un concerto de de Canto D'Aqui e Iria Estévez na sede da Fundación Rosalía en Padrón abría onte, domingo 18, as actividades do programa. Presentacións de libros e tertulias continúan as propostas en Braga ata o vindeiro xoves, día no que haberá unha cita simultánea en Braga e en Santiago, con cadanseu tributo a José Afonso. Para o propio 24 de febreiro, Braga acollerá a inauguración da Praceta Rosalía de Castro e o espectáculo Voa da compañía Tequexetéldere. O domingo 25 no Teatro Principal de Compostela celebrarase o concerto de peche desta semana con Uxía, a Banda Municipal e Canto D´Aqui.

De xeito similar, na noite do venres 23 o Teatro Colón da Coruña acollerá a Gala Rosalía de Castro, un evento que mestura música, da man de Abe Rábade xunto con Nastasia Zürcher, Najla Shami, Santi Cribeiro, Xiana Lastra con Andrea Porto e Tempo Catro; e mais poesía recitada por parte de Anxo Angueira, Cesáreo Sánchez Iglesias, Marta Dacosta e Rosalía Fernández Rial.

Finalmente a Fundación Rosalía preparou tamén unha programación especial para a semana. Como eixe deste ano, a entidade apostou pola gastronomía e convida a facer e degustar un Caldo de gloria, receita baseada nun dos poemas da autora. Locais de hostelaría ofertarán o 24 de febreiro este prato como tapa e convídase a usuarios de redes sociais a compartir imaxes e impresións da súa experiencia co mesmo cos hashtags #CaldodeGloria #DíadeRosalía.

Ademais, os días 23 e 24 relizaranse homenaxes florais á autora en Padrón e Compostela e na propia sede da Fundación acollerá o día 24 un concerto do Trío Rosalía e unha degustación do caldo preparado por Pepe Solla.