O Garaxe Hermético publica o manga Tam

Anémona de Río asina Tam, o primeiro manga en galego que publica a escola de BD O Garaxe Hermético. O volume de 72 páxinas a cor recolle "a historia dunha rapaza que recibe un convite para unha cea de antiguos alumnos e é víctima da tiranía da moda e a sociedade respecto ao aspecto físico da muller". A autora recibiu o Premio Fin de Curso 2017 da escola de banda deseñada e presentará publicamente este traballo o vindeiro 13 de febreiro na libraría Paz de Pontevedra. No día 14, nunha curiosa promoción, os 15 primeiros clientes en reservar cea no restaurante Il Piccolo da mesma cidade, recibirán un exemplar da obra que a autora dedicará ao vivo.

Pola súa banda, Astiberri acaba de presentar a reedición de Cuaderno de tormentas, obra que David Rubín publicara anteriormente con Planeta. O novo lanzamento incorpora novas capas, rotulación e 21 páxinas de extras. O autor anunciou unha xira de presentación que o traerá a diferentes librarías do noso país o vindeiro mes de outubro.

Da man da viguesa Fosfatina Edicións acaba de saír á venda Finquenboris do pontevedrés Berto Fojo. O volume é o octavo da segunda etapa da colección FOSFATINA 2000, impresa en risografía e con tiraxes limitadas. O traballo súmase a títulos recentes na mesma serie como Uno, dos; uno, dos de Óscar Raña ou Johnny va a la luna de Los Bravú.

Pola súa banda, o salón Héroes Cómic Con Valencia acaba de facer públicos os finalistas dos I Premios José Sanchis Grau. Na listaxe, Xulia Vicente aparece como única representación da BD galega coa súa candidatura ao galardón ao Futuro Talento do Cómic.