A Liga de Amigos de Barallobre, en Fene, acollerá este sabado 3 de febreiro a partir das 12 da mañá a I Gala dos Medios en Galego. Este evento contará coa presenza de Paula Carballeira, Uxía Sanmartín e o colectivo literario Moraima ademais de representantes de meios en galego e de diferentes partidos políticos e movemento sociais. O acto inicia as celebracións da primeira xeira do Día dos Medios en Galego. A nova efeméride, que se celebra o 7 de febreiro, homenaxea o nacemento en 1876 de O Tío Marcos da Portela, primeiro medio en galego.
A Asociación de Medios en Galego promove esta celebración para "contribuír ao recoñecemento institucional daquelas iniciativas pioneiras que procuraban a toma de conciencia dos problemas do país e reflexionaban na búsqueda de solucións" e "visibilizar os medios de comunicación que utilizan a lingua galega e poñen o foco na realidade do país".
