O tradicional "alto" ou "atranque" co que os Xenerais da Ulla se enfrontan verbalmente en cada Entroido, engade este ano unha novidade. Os veciños das parroquias de Bama e de Fao, en Touro, desenvolven por vez primeira un alto virtual a través do Facebook baixo a etiqueta #AltoBamaFao18. Neste enfrontamento, que botou a andar onte, cada un dos bandos publica os seus versos como comentarios á publicación orixinal, que por sorteo correspondeu á parroquia de Bama. Os "gústame" do público son os responsables de seleccionar quen vence no combate. Cada contrincante ten ata 48 horas para responder.
