A Deputación de Lugo presentou onte o programa de exposicións que se poderán ver ao longo de 2018 nos centros da Rede Museística provincial. En total serán máis de vinte mostras que abranguen desde a arte galega e internacional ata a artesanía. Entre as propostas presentadas destaca a mostra sobre a Colección Gil Varela, que se poderá ver do 15 de febreiro ao 15 de abril no Museo Provincial. Na mesma o público poderá achegarse á colección desta familia con pezas de creadores como Murillo, Zuloaga, Sorolla, Ribera ou Rosales. Canda a esta é de sinalar tamén o proxecto De Picasso a Annish Kapur, que repasa a creación de gravados de diferentes creadores internacionais e que se poderá ver na mesma sede entre abril e xuño.
No programa do Pazo de San Marcos desensvolverase entre o 12 abril e o 30 de xuño unha exposición sobre o traballo de Luís Seoane, mentres no CENTRAD poderá verse, deste este venres 19 e ata o 25 de febreiro unha exposición sobre instrumentos musicais feitos de barro. A nivel de artistas galegos, o ceramista Otero Regal, Roberto González, Pepe Galán ou Manuel Jorge contarán con exposicións monográficas. O programa inclúe tamén citas habituais como Eu ti elas nosoutras. Nos + outrxs en rede ou a mostra do Premio Galicia de Fotografía Contemporánea.
