A familia pode retirar en calquera momento a colección Álvaro Gil do Museo Provincial de Lugo

O día 24, a partir das nove da mañá, os herdeiros de Álvaro Gil poderán retirar, se así o queren, a impresionante colección que o filántropo lugués depositou no Museo Provincial de Lugo hai máis de tres décadas. E non é unha colección calquera: son cuarenta pezas de ouro da Idade do Ferro, entre as que destacan o torques de Burela ou o estraño carneiro alado tamén de ouro. Os descendentes de Gil gañaron o pleito á Deputación recoñecendo a propiedade da colección, e desde entón estase en negociacións. A familia pedía 3,1 millóns de euros, pero a taxación encargada polo organismo provincial era de 2,3 millóns. Agora, cumprindo a sentenza, a Deputación comunicou aos propietarios que poden recoller cando queiran a colección. Pero segundo sinalou El Progreso, familia e Deputación continúan a negociar.