O CDG abre hoxe un ciclo de teatro e obradoiros para crianzas

O ciclo Gran teatro para os máis pequenos do Centro Dramático Galego (CDG) regresa hoxe ao Salón Teatro de Santiago para celebrar o Nadal xunto ao público infantil. Esta carteleira especial combina a exhibición de tres espectáculos das compañías galegas Tanxarina, Caramuxo Teatro e Teatro do Noroeste con outros tantos talleres sobre monicreques, a figura de Maruxa Mallo e o espazo sonoro, respectivamente, baixo o lema Saca o artista que levas dentro. O obxectivo desta iniciativa é que as crianzas obteñan unha perspectiva diferente sobre os espectáculos que verán despois, ao tempo que coñezan como funciona o teatro por dentro. As idades recomendadas son a partir dos seis anos para o de monicreques e a partir dos tres anos, para o de Maruxa Mallo.

A programación ábrese hoxe con A casa do avó, de Tanxarina, mais o taller de monicreques Moita tea que cortar. Cándido Pazó é o autor e director desta historia, que dá comezo cando un neno recibe a noticia de que o seu avó vai quedar sen casa. Este espectáculo porase en escena hoxe e mañá. O venres 29 e o sábado 30 ofrécese o espectáculo Ela, de Caramuxo Teatro, mais o taller Mallo en decembro. A figura de Maruxa Mallo é o eixo central da nova montaxe de danza e teatro da compañía coruñesa, que crea un mundo fantástico a través da arte, as cores e o universo da gran pintora galega no ano en que a Academia Galega de Belas Artes lle dedica o Día das Artes Galegas. Na primeira semana de 2018 será a quenda de Animais de compañía, de Teatro do Noroeste, e do taller Soa igual a diferencia. Neste caso, as funcións están programadas para o mércores 3 e o xoves 4 de xaneiro, ás 19.00 h, mentres que o obradoiro terá lugar nesas mesmas datas desde dúas horas antes das representacións.