A coincidir co San Martiño a Sociedade Antropolóxica Galega (SAGA) presentaba a sétima entrega da súa publicación Fol de Veleno. O Anuario de Antropoloxía e Historia de Galiza aborda neste novo número "artigos que van dende o estudo simbólico ata a etnografía das construcións tradicionais galegas, pasando por traballos de antropoloxía da educación, de mitoloxía, de arte rupestre ou diferentes olladas ao redor de aspectos da cultura afgá ou siberiana", segundo explica a entidade no seu web.
Así, entre outros contidos atópanse no volume o artigo de Miguel Losada sobre "De martelos e deuses: achegas á mítica galega", o de Carmen Arnau titulado "El poder de atar los caballos", ou o de Duarte Fernández, arredor da súa recente tese doutoral, titulado "Construíndo os relatos de cambio nas reservas mariñas galegas". Rafael Quintía, Xosé Ramón Reigada ou Rafael Castro son outras sinaturas que se poden atopar na entrega.
