Quiosco: Fol de Veleno 3

Fol de Veleno, o anuario da Sociedade Antropolóxica Galega (SAGA), ten xa na rúa o seu terceiro número. A publicación medra 70 páxinas ata acadar as 200, nas que acolle 16 artigos sobre temas de etnografía e historia. Petróglifos inéditos, intervencións arqueolóxicas como a da Torre dos Mouros ou Pena Furada ou as aviformes na arte rupestre comparten espazo con textos sobre o chamanismo siberiano, o pago de enterros en Mesía, as lendas ancaresas sobre a morte ou a saudade no marco da mitoloxía europea. O volume está dispoñible en diferentes librarías ou solicitándollo directamente a SAGA, a un prezo de 10 euros.