As universidades e os conservatorios colaboran coa RAGBA para achegar a arte á cidadanía

A Real Academia Galega de Belas Artes (RAGBA), as tres universidades e os conservatorios superiores de música da Coruña e Vigo colaborarán en materia de divulgación académica, científica e artística. Estas entidades asinaron onte un protocolo de actuación para desenvolver as liñas de cooperación e a realización de talleres científicos, exposicións ou concertos para achegar a arte á cidadanía. Ademais, o protocolo contempla a celebración conxunta de accións conmemorativas das belas artes e impulsar liñas de colaboración nos proxectos de investigación das entidades .

O obxecto do acordo, que terá inicialmente un ano de vixencia, é fomentar o intercambio de experiencias nos campos da divulgación académica, científica e artística en xeral; favorecer a participación das entidades en proxectos de divulgación para aquelas actividades do ámbito das artes que o precisen; facilitar o asesoramento mutuo; e desenvolver liñas de actividades e accións de cooperación e intercambio recíproco en proxectos de divulgación da teoría e historia das belas artes a través da realización de talleres científicos, exposicións, concertos ou calquera outra actividade que achegue a arte ao cidadán. As diversas acción que se desenvolvan no marco deste convenio executaranse mediante documentos elaborados de común acordo entre as entidades asinantes, onde figurará o obxecto da colaboración, o plan de traballo, os participantes e o financiamento. Para facilitar a elaboración destes convenios e o seu cumprimento constituirase unha comisión de seguimento paritaria.