Catro residencias artísticas abren o curso do Salón Teatro

O Salón Teatro, espazo do Centro Dramático Galego en Compostela, comeza a súa nova temporada coas residencias artísticas como protagonistas. Así, ata o vindeiro 24 de setembro A Panadaría Teatro ensaia no local a súa nova obra, Elisa e Marcela, coprodución co propio CDG que chegará aos escenarios o vindeiro 14 de outubro. A seguir, será a compañía viguesa Feira do Leste a que empregue os medios técnicos e artísticos da sala para ensar as súas producións O exilio das moscas, que se exhibirá os días 28 e 29 de setembro, e Tras Tannhäuser, con funcións o 30 de setembro e mais o 1 de outubro.

O estado cru, proxecto do bailarín Javier Martín continúa co programa de residencias con actividades como o seminario Corpo e vibración0 ou unha conversa con Antón Lopo que se desenvolverán o vindeiro 4 de outubro. As funcións desta obra serán o 6 e o 7 de outubro e haberá encontros co público ao remate das mesmas. Finalmente, o colectivo vigués Anómico Teatro inicia o día 10 do mesmo mes a súa residencia para a montaxe de Chuvia, que se poderá ver do 20 ao 22 de outubro.

Segundo adiantou Fefa Noia, directora do CDG, agás Elisa e Marcela que xa formaba parte da Temporada 2016/2017 do CDG, o resto destas actividades fan parte do programa de residencias para o curso 2017/2018 e completaranse con colaboracións con novas compañías que serán anunciadas o vindeiro outubro na presentación oficial da Temporada.