O Museo do Pobo Galego, en Compostela, e mais o Museo Liste de Vigo acollerán entre os vindeiros 28 e 30 de setembro o seminario Museos, Etnografía e Antropoloxía. Este encontro quere reflexionar sobre o patrimonio etnoantropolóxico, os conceptos de patrimonio material e patrimonio inmaterial e analizar "os problemas e perspectivas actuais dos museos, coleccións, ecomuseos, recoñecidos ou non oficialmente, incluíndo parques temáticos, centros de interpretación, aulas didácticas..., de tema etnográfico e/ou antropolóxico en Galicia". Así, no programa participan representantes de entidades como o Museo Etnolóxico de Ribadavia, a Dirección Xeral de Patrimonio Cultural, o Museo da Terra de Melide, o Museo de Vilar de Santos, da Rede Museística provincial de Lugo, ou do Museo Massó entre outros. Ademais, haberá representantes de centros de Portugal e investigadores das universidades de Barcelona, Porto ou Oviedo.
A museística local, a cuestión das identidades alternativas na museística etnográfica, os museos etnográficos portugueses ou as posibilidades destes centros como espazos de aprendizaxe son algunhas das cuestións que se abordarán no encontro.