O décimo Culturgal terá a Portugal como país convidado

Con máis da metade do espazo reservado, os organizadores do Culturgal presentaban onte a imaxe e as principais novidades da que será a décima Feira das Industrias Culturais Galegas. Como principal novidade, Portugal incorporarase como cultura convidada na nova xeira. Deste xeito, e segundo explica a organización, "institucións, empresas e creadores lusos participarán no décimo Culturgal cunha marca conxunta baixo a que circunscribirán concertos, expositores e presentacións". A acción conta co apoio da Secretaría de Estado da Cultura de Portugal e da Bienal de Arte de Vilanova de Cerveira. Canda a isto, o xa anunciado espazo de arte contemporánea que se incorpora á feira contará "con presenza de artistas, galerías, estudantes, docentes e críticos". A nivel de imaxe, Pepe Barro asina un novo logo que se presentará como gif animado, e desde a organización anuncia que se incrementarán as actividades de dinamización desde os propios postos participantes. A cita celebrarase no Pazo da Cultura de Pontevedra entre o 1 e o 3 de decembro.