Culturgal presenta a súa edición 2015

Tal e como estaba anunciado será os vindeiros 4, 5 e 6 de decembro cando o Pazo da Cultura de Pontevedra acolla a vindeira edición de Culturgal, a Feira das Industrias Culturais. Os organizadores do evento presentaban onte a vindeira xeira, para a que se cobrará entrada ao igual que no pasado ano. Baixo o lema Presume de Culturgal a iniciativa acollerá actividades para diferentes públicos coa palabra como eixe desde diferentes perspectivas. Literatura, tecnoloxía, música, foros e encontros fan parte dun programa no que se elimina a tenda oficial, se procurarán evitar interferencias sonoras entre actividades e se potenciará o espazo reservado ao público de entre 0 e 3 anos. Os interesados en participar no evento teñen ata o 30 de outubro para reservar postos e ata o 30 de setembro para propor actividades.