Damien Manivel imponse no II Festival Novos Cinemas con Le Parc

Onte, domingo 2 de xullo, botaba o feche en Pontevedra a segunda edición do festival Novos Cinemas. A xeira rematou cunha entrega de premios na que se impuxo o filme Le Parc, de Damien Manivel, a quen o xurado recoñeceu co premio oficial á mellor longametraxe en recoñecemento á "verdade coa que retrata os primeiros encontros amorosos e a súa arriscada proposta narrativa". Ademais, acordou outorgalle unha mención a I Tempi Felici Verranno Presto, de Alessandro Comodin,"pola forza e a suxerencia das súas imaxes que viaxan dunha maneira moi libre da realidade ao mito". Canda a estes, destaca o premio do público, que seleccionou Estiu 1993 de Carla Simón como a súa favorita. O premio permitirá que o filme se integre na rede de distribución Cinemas de Galicia da Axencia Galega das Industrias Culturais.

O Premio Xurado Novo Café Sabora foi para Occidental, de Neïl Beloufa, "pola creación dun universo estético e pictórico cunha ollada fresca e arriscada", mentres o Premio especial NUMAX Sección Latexos caeu en Una vez fuimos salvajes de Carmen Bellas, a recoñecer o seu "retrato da mocidade que habita a periferia dunha gran cidade, a partir dun inventario de miradas, xestos, situacións e expresións que conectan as infancias de diferentes culturas na procura do universal que comparten".

O xurado oficial estivo composto por Alejandra Trelles, Carlos Losilla e Nely Reguera, mentres que o no novo participaron Iria Potti Vázquez, Pablo Aguilar Martín, Irene Martínez Doce, Ana Pérez Valdés e Marta Rodríguez Valverde.