Lucecús Teatro estrea a produción 'PingüiSOS'

A partires dunha noticia real sobre a chegada de centos de pingüíns ás costas brasileiras arrastrados pola corrente e confundidos pola calor tropical, a compañía teatral Lucecús Teatro ven de presentar o seu novo espectáculo familiar: PingüiSOS. A compañía estreou onte no Concello de Cariño esta obra na que, a través de tres pingüíns que viaxan nunha balsa, camiño da terra desexada, fan unha fábula sobre os procesos migratorios. Estes tres individuos procedentes dunha realidade tan diferente viaxan ao corazón de Europa, na procura da felicidade da que tanto escoitaron falar e para chegar ao seu obxectivo terán que pasar unha chea de aventuras por mar e terra baixo un sol ou un frío que abrasa ou conxela. A súa primeira parada e porta de entrada a Europa será Galicia. Con este divertido espectáculo a compañía integrada por Anxo Manoel, Isa Herrero e Rubén Pérez – que interpretan a estes extraviados pingüíns- busca iniciar nunha faceta máis social da compañía. A dramaturxia e dirección corren a cargo de Rubén Pérez e a escenografía é de Iago Lamela. A obra poderá verse o vindeiro 12 de agosto en Malpica.