Novas montaxes levan ás táboas o mundo de Manuel María

Continúan as adaptacións de obras de Manuel María, autor homenaxeado no Día das Letras Galegas, a diferentes formatos. A nivel escénico, nos últimos días presentábanse dúas novas montaxes sobre traballos do poeta chairego. Así, a compañía Lucecús Teatro está de xira con A verdadeira historia do poeta Manuel de Paderna, unha obra na que a compañía recolle os textos protagonizados por este personaxe de Manuel María, ademais de framentos de As rúas do vento ceibe e Os soños na gaiola. Anxo Manoel e Isa Herero tratan na obra temáticas como "a soidade, o amor ou a loita persoal a través dun espectáculo comprometido coa nosa cultura, a nosa lingua e o noso país, aproveitando a mirada de Manuel María". O vindeiro 22 de abril o espectáculo poderá verse no auditorio Gustavo Freire de Lugo.

Pola súa banda, o libro-CD Canda o cuco no que Uxía e Maxín Blanco musican poemas de Manuel María, conta agora cunha montaxe escénica. Santi Cribeiro e Hector Lorenzo acompañan os dous intérpretes nunha iniciativa que aposta polo formato músico-teatral coa colaboración de Inacio Vilariño. Manipulación de obxectos, títeres, música e traballo actoral mestúranse co aderezo das ilustracións de Leandro Lamas. A estrea é este venres 8 de abril no Auditorio Municipal de Ourense. O espectáculo visitará Muros o sábado 9.