Continúan as celebracións das tres décadas de traballo da compañía teatral Chévere. Á xa anunciada recuperación das obras Río Bravo, Annus Horribilis e Ultranoite no país dos ananos, que se poderán ver en Compostela ao longo do mes de xullo, súmase agora o anuncio de que Kalandraka editará as obras completas do grupo. Ademais, o vindeiro mes de setembro a capital galega acollerá a posta en escena dunha antoloxía das Ultranoites. Aínda que as tres obras que agora recupera a compañía só se poderán ver por xunto en Compostela, o grupo leva tamén á Mostra internacional de Teatro Cómico e Festivo de Cangas unha función de Río Bravo o día 1 de xullo. Pola súa banda na Mostra Internacional de Teatro de Ribadavia poderá verse Annus Horribilis o día 16. A mesma obra visitará o festival luso Tom de Festa, en Tondela, na véspera.
