A Fundación Granell acolle esta tarde a presentación de Santiago de Compostela. A cidade do milagre, o volume de editan Galaxia e o Consorcio da capital galega para lembrar a Carlos Casares. O volume, que conta con fotografías de Ramón Fernández Hermida, recupera nas súas 95 páxinas dous artigos do autor homenaxeado no Día das Letras deste ano. Trátase de textos orixinalmente escritos en castelán en 1993 e que agora se presentan con traducións ao galego e inglés. O primeiro deles, Santiago. Milagro y leyendas viu a luz na revista Leer, mentres o segundo El milagro de Santiago de Compostela puido lerse en Ronda Iberia. Os textos propoñen unha viaxe literaria pola cidade relacionándoa coa lenda do Apóstolo.
