A metraxe atopada protagonizará a nova edición do (S8)

O Concello da Coruña acollía a pasada semana a presentación da nova edición do (S8) Mostra de Cinema Periférico. A cidade acollerá entre o 31 de maio e o 4 de xuño a oitava xeira do festival que nesta ocasión terá como protagonista o "found footage" ou metraxe atopada. Joseph Cornell, considerado o pai deste xénero, que recicla imaxes xa filmadas para lles outorgar novos significados mediante a montaxe, protagonizará unha homenaxe baixo o título Obxectos e aparicións. Canda ao seu traballo poderán verse traballos de Céline Fontaine, Luther Price. O programa Found sounds, protagonizado por Barbara Meter e un obradoiro sobre esta técnica a cargo de María Cañas completan este apartado do programa.

Canda a isto, o festival acollerá programas específicos dedicados a Aldo Tambellini, á cineasta alemá Helga Fanderl e estreas do canadense Stephen Broomer ou Steve Polta. No apartado Sinais haberá a habitual representación de cinema galego de vangarda con atención á directora Diana Toucedo, e coa selección de Sinais en Curto, que este ano reúne traballos de Carla Andrade, Jaoine Camborda, Helena Girón, Marcos Flórez e Samuel Delgado, entre outros. Como estrea, o (S8) ofertará a xa habitual sección de cine-concerto inaugural, no que se proxectará Fausto, de Murnau, sonorizado ao vivo pola Orquestra Sinfónica de Galicia.