O Diario Oficial de Galicia recolle hoxe a convocatoria de subvencións para a edición en lingua galega de recursos didácticos curriculares para niveis non universitarios. Ao igual que o ano pasado, a Consellaría de Educación e Cultura achega un orzamento de 170.000 euros para esta liña, á que poden optar editoras do país. A convocatoria esixe que os proxectos presentados estean en galego agás proxectos trimestralizados de primaria "nos cales, cando menos, o 60 % da proposta se realice en lingua galega e nos cales as materias de obrigada impartición en galego, segundo o Decreto 79/2010, do 20 de maio, estean en galego". Os proxectos presentados teñen que ter unha tiraxe mínima de mil exemplares no caso dos impresos e de 500 no dos multimedia, e o prazo para optar as subvencións estará aberto durante un mes a partir de mañá.
