Pontevedra e Carballo abren os libros con iniciativas propias

Pasen e lean. Esa será a proposta coa que Pontevedra celebrará este domingo 23 de abril o Día Internacional do Libro fomentando ademais os establecementos libreiros locais exclusivamente, nun formato diferente á feiras do Libro Novo da rede galega que non ten este ano evento na capital do Lérez. A praza da Ferrería acollerá un evento no que once libreiros da cidade porán a disposición dos asistentes as últimas novidades editoriais. O espazo instalado na praza da Ferraría contará ademais cun amplo programa de actividades que se desenvolverán ao longo de todo o día, pensadas tanto para público infantil como adulto e que rematará ás 19.30 horas cun concerto de Flip Corale, un grupo de rock pontevedrés. As librarías participantes serán Paz, Seijas, Cronopios, Patakafrita, DLectum, Cao, Aviones de Papel, Nobel, Clip, El Pueblo e Metáfora.

O lema O mundo que queremos e un debuxo da carballesa Laura Tova motivan e ilustran a XII Semana do Libro e da Lectura de Carballo, que se celebrará no Pazo da Cultura do 24 ao 28 de abril, organizada pola Asociación Socio-Pedagóxica Galega e o Concello, co patrocinio da Fundación Luis Calvo Sanz e a colaboración de Kalandraka e outras editoriais que cederon libros para o evento, como Baía, Cumio, Galaxia, OQO, Urco e Xerais. Serán cinco días pensados para e protagonizados polos máis cativos, os alumnos de infantil e primaria dos colexios carballeses máis o veciño CEIP Canosa-Rus. Como en pasadas edicións, o programa deste ano repartirase en actividades de mañá (para o alumnado dos centros de ensino) e de tarde (abertas a todo o público). Música, poesía, contacontos, maxia, ciencia, debuxo, exposicións.