O Festival de Cans chega a un acordo coa AGADIC e recibirá axuda pública

Na rolda de prensa de hoxe do Festival de Cans, na que se presentaban as primeiras novidades da XIVª edición, non había ningún representante da Axencia Galega de Industrias Culturais, AGADIC, pero ao final o festival si recibirá unha parte das axudas públicas das que foi descartado por "defectos de forma". A representante da organización do evento por parte da Asociación Cultural Arela, Queca Losada, anunciou un acordo entre os festivais inicialmente rexeitados e a AGADIC que consistirá no reparto entre eles da cantidade sen repartir da partida orzamentaria correspondente, uns 33.000 euros en total. Os detalles deste acordo saído do diálogo coa administración aínda non son públicos pero Losada si comentou que a contía que Cans recibirá será menor dos 29.000 euros aos que optaba Cans na convocatoria de axudas e que o devandito acordo implica a retirada dos recursos interpostos contra a Administración pola resolución do procedemento concorrente. Ademais de cans nesta situación están outros catros eventos, Curtocircuito e Cineuropa de Santiago, Freakemacine da Coruña e Primavera do Cine de Vigo, que tamén asinarían o acordo que se xestou desde a Coordinadora de Festivais, segundo Losada.

No local da tenda Rei Zentolo, na compostelá Rúa do Vilar, Queca Losada exerceu de principal representante do Festival do can amarelo en ausencia do director do mesmo Alfonso Pato e presentou a imaxe gráfica deste ano para o evento que estará en cartaces, camisetas e outros elementos de mercadoría habituais e que basea a imaxe deste ano na característica de colaboración popular do evento. O acto contou tamén coa presenza de Alfonso Míguez , protagonista da película Historia de un satélite , das irmás coruñesas e residente en Utah, Sonia e Miriam Albert-Sobrino, estrea mundial coa que abrirá o festival. Outro Alfonso, Zarauza, presentou tamén a lista de membros do xurado que el mesmo preside nesta edición tras ter participado con películas propias en anos anteriores. Catro mulleres e tres homes conforman a equipa xuíz deste ano: a actriz Sonia Castelo; a xornalista del canal de TVE La 2, Mara Torres; a montadora Diana Toucedo; Luísa Romeo, de Frida; o director asturiano José Manuel Kirós; o actor César Goldi e o propio Zarauza. No acto de hoxe ante os medios tamén se presentou a canción oficial desta edición do festival, que como sempre conta cun programa musical e de actos que se engade ao puramente audiovisual. Eladio Santos, líder da banda Eladio y los Seres Queridos, é o compositor e intérprete da canción Se ti ves comigo a Cans para a que dixo inspirarse en moitos elementos animistas e que interpretou en directo para os presentes. O 25 de abril sairán á venda en liña os primeiros 600 paquetes do festival que por 20 euros máis gastos inclúen a entrada ao festival, a camiseta, unha chapa especial e mailo programa.

A Historia dun Satélite - Anuncio en Galego 2015 from ALSO SISTERS on Vimeo.