Retablo de Lugrís para o Instituto de Cultura Hispánica de Madrid. Foto: Abanca
Por vez primeira unha grande exposición recolle o traballo de Urbano Lugrís como muralista. A sede de Afundación na Coruña abre o vindeiro 31 de marzo Lugrís, paredes soñadas, unha selección de 106 pezas dos fondos de Abanca e de Afundación que se presentan a coincidir co fin dos traballos de restauración do mural Vista de A Coruña 1669, que ficará exposto na sede do banco na cidade. Rubén Ventureira comisaría un proxecto no que se inclúen pezas de colección particulares, entre elas varias que nunca se amosaran en público, como o rascuño para a igrexa de San Pedro de Visma, o óleo Stella Maris, os vidros decorativos dunha celosía deseñados para unha vivenda da Coruña, un mural que pintou no Sanatorio Álvarez, de Santiago ou debuxos realizados para a revista Vida Galega. A mostra, que contará cun amplo catálogo, poderá verse ata o vindeiro 2 de setembro.
