O Mosteiro de Melón recuperará un dos seus claustros

O claustro da Hospedaría do Mosteiro de Melón volverá á vida. O Ministerio de Fomento abría o pasado 7 de marzo no Boletín Oficial do Estado a licitación primeira fase dos traballos de rehabilitación deste conxunto. En total serán 1,78 millóns de euros os destinados a este proxecto, que se integran no Plan Director do conxunto e que fan parte dos fondos do programa de rehabilitación arquitectónica. Segundo recolle Historiadegalicia.gal, está previsto que as obras comezen na segunda metade deste ano e que se desenvolvan ao longo de trinta meses.