O Plan Turístico Xacobeo 2021-2022 achega 22,7 millóns a elementos patrimoniais galegos

A recuperación do Castelo de Monterrei concentra 14 millóns destes investimentos

A recuperación do Castelo de Monterrei concentra 14 millóns destes investimentos
Castelo de Monterrei. Fonte: Turgalicia.
O Boletín Oficial do Estado deste 8 de decembro publicaba o decreto polo que o Ministerio de Industria, Comercio e Turismo achegará 22,7 millóns de euros en subvencións directas a "proxectos sustentables de mantemento e rehabilitación do patrimonio histórico de uso turístico dos Camiños de Santiago" e de titularidade pública no noso país. Este programa fai parte do Plan Turístico Nacional Xacobeo 2021-2022 e conta cos fondos Next Generation EU para a recuperación económica. Galicia é a comunidade que acumula máis fondos desta liña, dotada cun total de 121 millóns de euros.

En concreto, os fondos destinados ao noso país apoiarán doce proxectos propostos pola Xunta de Galicia, segundo detallou o pasado 10 de decembro a Delegación do Goberno en Galicia. O conxunto do Castelo de Monterrei, en Verín, será o máis beneficiado desta liña de apoio, xa que suma 14 millóns do total. Os fondos destinaranse a actuacións de recuperación que inclúen a posta en marcha dun museo, o acondicionamento dun albergue ou o desenvolvemento de rutas de senderismo na contorna deste ben.

Tamén están previstas actuacións sobre o Parque do Pasatempo en Betanzos, que xa se presentaron ao público e que achegarán 1,5 millóns de euros á rehabilitación deste conxunto. Diferentes actuacións nos concellos de Quiroga, A Pobra do Brollón, Ribas de Sil, O Saviñao, Belesar e Chantada, dotadas con 1,4 millóns, e mais o acondicionamento da Illa de Ons, coa mesma contía, conseguen o seguinte maior apoio. A mellora das instalacións da Torre de Hércules contará con 995.000 euros nunha listaxe que inclúe investimentos na Casa Museo de Valle Inclán de Vilanova ou a rehabilitación do cárcere vello de Tui.

A estes fondos engádese outra liña de axudas, recollida no mesmo acordo, da que Galicia recibirá 3 millóns de euros que se dedicarán á mellora enerxética e rehabilitación do Pazo de Raxoi. De xeito máis concreto, os fondos permitirán a recuperación do interior da capela do edificio histórico compostelán, mellorar a accesibilidade, substituír os ascensores e conversar espazos representativos do conxunto, entre outras accións. Estes fondos súmanse ao xa anunciado investimento de 18 millóns de euros para actuacións en mosteiros e catedrais do noso país no marco do mesmo Plan Nacional Turístico Xacobeo 2021-2022.

Listaxe completa de proxectos apoiados polas subvencións a mantemento e rehabilitación do patrimonio histórico de uso turístico

- Adecuación dos faros de Sálvora e Rúa en Vilagarcía de Arousa. 800.000 euros
- Rehabilitación do cárcere vello en Tui para crear un centro de visitantes e albergue de peregrinos. 400.000 euros.
- Recuperación e valorización turística da vila de Monterrei. 14 millóns de euros.
- Musealización do conxunto histórico-artístico de Mondoñedo. 272.850 euros.
- Rehabilitación de la Casa Natal de Valle Inclán en Vilanova de Arousa 432.150 euros.
- Recuperación e posta en valor do Parque do Pasatempo, en Betanzos. 1,5 millóns de euros.
- Mellora do Castelo de Santa Cruz na Guarda. 200.000 euros.
- Restauración ambiental do conxunto da Ribeira do Lérez, en Pontevedra, a incluír a Illa das Esculturas. 1 millón de euros.
- Mellora das instalacións da Torre de Hércules, na Coruña. 995.000 euros.
- Rehabilitación do recinto das Torres de Catoira, incluíndo a capela do apóstolo e os peiraos. 300.000 euros.
- Proxecto da Ribeira Sacra con actuacións nos concellos de Quiroga, A Pobra do Brollón, Ribas de Sil, O Saviñao, Belesar e Chantada. 1,4 millóns de euros.
- Acondicionamento da Illa de Ons, no Concello de Bueu. 1,4 millóns de euros.