O Alt celebra esta fin de semana a súa edición final

Tal e como estaba anunciado, hoxe dez de marzo comeza a derrareira edición do Alt, o festival alternativo de artes escénicas Vigo. Co título FinALT, o encontro desenvolverase ao longo da fin de semana cun programa reducido a seis actuacións, das cales catro se integran no ALT Procrea en Feminino, programa de apoio para creadoras galegas. No marco desta iniciativa, que conta co apoio da Axencia Galega das Industrias Culturais, o festival inicia a súa actividade no MARCO ás 19 horas coa representación de Bailarina, da coreógrafa catalá Sonia Gómez e de Bailarina hipnótica, que a galega Sonia Gómez Vicente elaborou a partir dela.

Masu Fajardo, sábado e Celete González, a fechar o evento domingo, son os outros nomes integrados neste ciclo. A maiores, o Alt contará sábado coa presenza de Matarile Teatro, que presentará unha edición especial da súa obra Antes de la metralla, mentres domingo Cuina Furtiva achegará unha actividade gastronómica escénica.

No proceso da declarada extinción do festival, unha campaña en Change.org está a recoller sinaturas para lle solicitar ao Concello de Vigo que recupere o apoio económico ao evento. Segundo os organizadores, os sucesivos recortes neste financiamento son a causa da suspensión dun festival que leva ás costas dezaseis edicións.