Fotografía do Flickr de Emma Ríos
A coincidir co Día Internacional da Muller, Pontevedra facía públicos onte os gañadores dos I Premios Virxinia Pereira de Banda Deseñada pola igualdade, que organiza o Concello en colaboración coa escola de BD O Garaxe Hermético. Francisco Pérez Outes, Pablo Prado Fernández, Adán Álvarez Rivas fíxéronse cos tres primeiros postos na primeira edición do certame mentres que Elísabet García Aires levou un accésit. A maiores, a concelleira de Igualdade, Carmen Fouces e mais o director de O Garaxe Hermético, Kiko da Silva, anunciaron que se concedeu un premio honorífico a Emma Ríos. A traxectoria internacional desta autora de banda deseñada arousá fíxoa merecente deste recoñecemento, que pretende tamén pór de relevo referentes femininos no mundo da novena arte.
