A primeira escola galega de banda deseñada abrirá este inverno

Pendente de permisos legais e de rematar as obras para abrir as súas portas, Kiko da Silva ultima o proxecto O garaxe hermético, que quere ser a primeira escola profesional de banda deseñada e ilustración de Galicia. A iniciativa pretende desenvolver polas mañás cursos para a formación de debuxantes que aspiren a traballar nestes campos, cun programa formativo de tres anos que impartirán Kiko da silva, Fernado Iglesias, Miguel Porto e mais os irmáns Jacobo Fernández e Norberto Fernández. Canda a isto, haberá cursos monográficos a cargo de autores de primeira liña do panorama estatal e durante as tardes clases de iniciación para afeccionados.

O espazo, situado na rúa Álvaro Cunqueiro da Cidade do Lérez, dispón de mesas de debuxo e de sala de ordenadores onde aprender as técnicas de coloreado e tratamento dixital do debuxo. Ademais, acollerá as oficinas de Retranca Editora e terá un espazo habilitado para exposicións. Está previsto que o centro abra as súas portas de cara ao vindeiro mes de marzo, cunha exposición de orixinais de Miguelanxo Prado.

Ata o momento, a formación de BD no noso país estaba limitada a clases en diferentes academias e centros de arte e obradoiros puntuais, sen que existise un centro específico dedicado a este fin e que presentase un programa formativo plurianual.