Trece espectáculos acadan as candidaturas dos XXI Premios María Casares do teatro

O Salón Teatro de Santiago acolleu onte nun ambiente distendido e festivo o acto de comunicación de finalistas dos XXI Premios de teatro María Casares con entrega de diplomas e xerriñas ás persoas nomeadas. A Asociación de Actores e Actrices de Galicia (AAAG) convocou alí á profesión escénica para desvelar os catro nomes que concorrerán á estatuíña por cada unha das catorce categorías dos galardóns. Dun total de 44 espectáculos presentados ao final foron 13 os que acadaron algunha candidatura. O tolleito de Inishmann, coprodución de Contraproducións e o FIOT Carballo, converteuse neste 2017 na produción con maior número de finalistas ao obter un total de 11 nomeamentos. Pola súa banda, Eroski Paraíso, de Chévere, aspira a 8 galardóns. Raclette, de Ibuprofeno Teatro, opta a 5 premios. Estas tres producións teatrais disputaranse os apartados á mellor espectáculo e dirección. Voaxa e Carmín, de ButacaZero, tamén aspira a levar 5 xerras María Casares, mentres que Foucellas, de Talía Teatro, competirá en 3 categorías. Os espectáculos A nena que quería navegar, de Redrum Teatro, e Os amores de Jacques o fatalista, de Producións Teatráis Excéntricas, optan a 2 xerras María Casares. Finalmente, optando a 1 galardón atópanse Xurdefet (Jour de Fête), de Berrobambán; Pavillón Lino, de Caramuxo Teatro; Tartufo, a produción estrela do Centro Dramático Galego da pasada temporada; Get Back, de Eme2 Producións; Danza da Choiva, de Elefante Elegante, e Os Rockenstein, de Malasombra Producións. Moitos destes espectáculos aínda están sobre as táboas nos teatros do país.

O acto foi presentado pola actriz e vogal da entidade Nieves Rodríguez e contou cun discurso por parte de Ernesto Chao, presidente da AAAG, para destacar a participación deste ano e a calidade dos espectáculos. Chao non quixo entrar nas polémicas recentes sobre o CDG mais asegurou ter moito que dicir pero que se reservaba para a gala de entrega o vindeiro 29 de marzo no Teatro Rosalía Castro da Coruña. Na Festa dos Nomeados participaron, ademais, representantes dalgunhas das diferentes institucións que colaboran na organización dos premios: A Axencia Galega das Industrias Culturais (Agadic-Consellería de Cutura, Educación e Ordenación Universitaria-Xunta de Galicia), a Deputación da Coruña, o Concello da Coruña, a Fundación AISGE e a Fundación SGAE. Deste xeito, entregáronlles aos nomeados e nomeadas diplomas e as xerriñas María Casares Jacobo Sutil, director da Agadic; Goretti Sanmartín, vicepresidenta da Deputación da Coruña; Yolanda Pereira, coordinadora da Delegación AISGE (Artistas Intérpretes Sociedad de Gestión), e Patricia Blanco, en representación da Fundación SGAE.

O listado de candidaturas finalistas por espectáculo queda así:

1. O tolleito de Inishmaan (11): espectáculo, dirección (Cándido Pazó), actor protagonista (Santi Romay), actriz secundaria (por partida dupla: Susana Dans e María Roja), actor secundario (Evaristo Calvo), adaptación/tradución, escenografía, maquillaxe, vestiario e iluminación.

2. Eroski Paraíso (8): espectáculo, dirección (Xesús Ron), actriz protagonista (Patricia de Lorenzo), actor protagonista (Miguel de Lira), actriz secundaria (Cristina Iglesias), texto orixinal, iluminación e música orixinal.

3. Raclette (5): espectáculo, dirección (Santiago Cortegoso), actor secundario (por partida dupla: Toni Salgado e Salvador del Río) e texto orixinal.

4. Voaxa e Carmín (5): actriz protagonista (por partida dupla: Mabel Rivera e Belén Constenla), texto orixinal, maquillaxe e vestiario.

5. Foucellas (3): escenografía, iluminación e música orixinal.

6. A nena que quería navegar (2): espectáculo infantil e vestiario.

7. Os amores de Jaques o fatalista (2): adaptación/tradución e música orixinal.

8. Tartufo (1): actor protagonista (César Cambeiro).

9. Xurdefet (Jour de Fête) (1): adaptación/tradución.

10. Pavillón Lino (1): espectáculo infantil.

11. Get back (1): escenografía.

12. Danza da choiva (1): espectáculo infantil.

13. Os Rockenstein (1): maquillaxe