A presenza galega en ARCO redúcese a dúas galerías

A retirada de Ad Hoc da sección #Soloprojects deixa a presenza galega na feira ARCO en só dúas galerías. As viguesas Bacelos e PM8 serán as únicas participantes do país na feira da arte contemporánea que abre mañá as súas portas en Madrid. Canda a elas, terán representación no sector de publicacións as cabeceiras Dardo e Latamuda. Haberá tamén artistas galegos presentes nos postos de galerías foráneas, como o caso de Carme Nogueira, representada na lisboeta Kubisk Gallery.

En paralelo, medra a presenza de espazos do noso país en citas alternativas como Art Madrid, que tamén comeza o 22 de febreiro. Canda á xa habitual Moret Art, repite por segundo ano a galería Montenegro e incorpórase por vez primeira Luísa Pita, galería que continúa o proxecto da compostelá Bus Station Space. Outra cita alternativa, JustMad, que comeza hoxe, mantén a presenza de Metro, mentres o novo espazo lugués Iskoo colle o relevo de Marisa Marimón no encontro. Finalmente Trinta mantén a súa aposta por Drawing Room, encontro especializado en debuxo.